Вазирлар Маҳкамасининг Таълим ва илм-фан, ёшлар сиёсати, маданият, ахборот тизимлари ва телекоммуникациялар масалалари комплекси соҳаларининг 2017 йилнинг биринчи чорагида ижтимоий-иқтисодий ривожлантириш якунлари ва иқтисодий ислоҳотларнинг бажарилишига бағишланган йиғилиши бўлиб ўтди. Бу ҳақда ЎзА хабар бермоқда.
Жорий йилнинг биринчи чорагида комплекс бўйича жами 1 триллион 637 миллиард сўмлик маҳсулот ишлаб чиқарилди ва хизматлар кўрсатилди. 2016 йилнинг шу даврига нисбатан ўсиш суръати 118 фоизни ташкил этди.
Комплекс соҳаларида 30 миллион 800 минг долларлик хизматлар ва маҳсулотлар экспорт қилинди. 59 миллион 300 минг долларга тенг инвестициялар жалб қилинди ва режа кўрсаткичи 175 фоизга бажарилди.
Йиғилишда умумтаълим мактаблари, академик лицейлар ва касб-ҳунар коллежлари, олий таълим муассасаларида ўқитиш сифатини тубдан ошириш, замонавий ўқув режалари ва услубларини жорий этиш, ўқувчиларга махсус фанлар, мамлакат ва жаҳон цивилизацияси тарихи, хорижий тиллар ҳамда замонавий компьютер дастурларини чуқур ўргатиш, педагоглар ва профессор-ўқитувчилар таркибини мутахассислар билан тўлдириш, уларнинг малакасини ошириш масалалари атрофлича муҳокама қилинди.
Ахборот-коммуникация технологияларини изчил ривожлантириш, давлат ва хўжалик бошқаруви, маҳаллий ҳокимият органларида замонавий ахборот-коммуникация технологияларини янада кенг жорий этиш юзасидан амалга оширилиши лозим бўлган долзарб вазифаларнинг бориши, компьютер саводхонлиги бўйича ходимлар билим даражасини ошириш натижалари таҳлил этилди.
Интерактив давлат хизматлари кўрсатиш орқали кичик бизнес ва хусусий тадбиркорлик субъектлари ҳамда аҳоли дуч келаётган бюрократик тўсиқ ва ғовларни бартараф этиш, уларни ахборот билан таъминлаш тизимини ривожлантириш мақсадида амалга оширилган ишлар муҳокама қилинди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)