Россияликларнинг 81 фоизи Путиннинг президентлик фаолиятидан мамнун

Россияликларнинг 81 фоизи Владимир Путиннинг Россия президенти лавозимидаги фаолиятини маъқуллайди, 64 фоизи эса президент сайловида унинг номзодини қўллаб-қувватлашга тайёр. Бу ҳақда Россиянинг «Жамоатчилик фикри» жамғармаси томонидан ўтказилган ижтимоий сўров натижалари дарак бермоқда, деб ёзади «Газета.ru».

Сўровномада иштирок этганларнинг 78 фоизи Россия президентига ишонишини, 27 фоизи эса сўнгги бир ойда Путинга янада кўпроқ ишонишни бошлаганини билдирган.

Агар келаси якшанба куни Россия президенти сайловлари ташкил этилганида, сўровномада қатнашганларнинг 64 фоизи Путинга, 10 фоизи Россия либерал-демократик партияси етакчиси Владимир Жириновскийга, 2 фоизи эса Коммунистик партия раҳбари Геннадий Зюгановга овоз беришини айтган.

Айни вақтда, Россия бош вазири Дмитрий Медведевга россияликларнинг 41 фоизи ишонади, 47 фоизи эса «катта эҳтимол билан ишонмайди» ёки «мутлақо ишонмайди». Сўнгги бир ой ичида ҳукумат раҳбарига камроқ ишонувчилар сони 32 фоизгача кўпайган, кўпроқ ишонувчилар сони эса 11 фоизни ташкил этган.

Хабар беришларича, сўровнома 25—26 март кунлари ўтказилган, унда Россиянинг 73 ҳудудидаги 207 та аҳоли пунктида истиқомат қилувчи жами 3 минг респондент иштирок этган.

«Дарё»нинг Telegram’даги расмий канали — @toshqindaryo’га аъзо бўлинг!