АҚШ ва Чили президентлари Венесуэладаги сиёсий тангликдан ташвиш билдирди
АҚШ ва Чили президентлари Дональд Трамп ҳамда Мишель Бачелет 19 март, якшанба куни бўлиб ўтган телефон орқали мулоқот давомида, жумладан, Венесуэладаги ички сиёсий тангликни ҳам муҳокама қилди. Бу ҳақда «ТАСС» хабар бермоқда.
Оқ уй матбуот хизматига кўра, Трамп ва Бачелет аввало АҚШ ҳамда Чилининг икки томонлама муносабатлари, хусусан, савдо соҳаси ва хавфсизлик масалалари борасидаги ҳамкорликни муҳокама қилди.
Шунингдек, АҚШ етакчиси Венесуэладаги вазиятдан ташвиш билдирди. Давлат раҳбарларининг «демократик тамойиллар Ғарбда илгари сурилиши муҳимлиги» ҳақидаги фикрлари бир жойдан чиқди.
Трамп Венесуэладаги вазиятни 18 март, шанба куни Бразилия президенти Мишель Темер билан ҳам муҳокама қилганди.
Эслатиб ўтамиз, олдинроқ Венесуэла расмийлари АҚШ президенти Дональд Трампнинг мамлакат ички ишларига аралашишини қоралаган ва Оқ уй кўрсатмаларига эргашиш ниятида эмаслигини билдирганди.
