Бугун «Ювентус» — «Порту» ҳамда «Лестер» — «Севилья». UzReport улардан бирини танлаб олди

Европа Чемпионлар лигаси учрашувларини Ўзбекистон ҳудудида трансляция қилиш ҳуқуқини қўлга киритган UzReport телеканали бугун — Тошкент вақти билан 00:35 дан бошлаб жонли режимга ўтади.

14 март куни Европанинг тўрт клуби Чемпионлар лигасининг чорак финали йўлида кураш олиб боради. «Порту» Туринда «Ювентус» меҳмони бўлса, «Севилья» туманли Албионда «Лестер»га қарши саф тортади.

Ҳар икки учрашув бир вақтда старт олади. UzReport қизиқиш нисбатан каттароқ бўлгани учун «Лестер» — «Севилья» учрашувини эфирга узатишни режалаштирган. Томонларнинг «Севилья» майдонида ўтган дастлабки учрашувида Хорхе Сампаоли шогирдлари 2:1 ҳисобида зафар қучган бўлиб, мазкур беллашув италиялик мутахассис Клаудио Раньери учун «Лестер»даги сўнггиси бўлиб қолганди.

«Ювентус» эса Португалиядан 2:0 ҳисобидаги ғалаба билан қайтиб келишнинг уддасидан чиқа олган. Шу томондан олиб қараганда, томонларнинг Италияда ўтадиган ўйинида Массимилиано Аллегри шогирдлари катта қийинчиликка дуч келмаслиги ҳам мумкин.