Қирғизистонда Сурия ва Ироқда жанг қилиш учун одам ёллаш билан шуғулланган шахс қўлга олинди

Қирғизистон миллий хавфсизлик давлат қўмитаси ходимлари фуқароларни ёллаш ва Сурия ҳамда Ироққа жўнатиш билан шуғулланиб келган шахсни қўлга олди. Бу ҳақда қўмита матбуот хизмати маълум қилди, дея хабар беради «ТАСС». 

«Халқаро террорчи ташкилотнинг 1977 йилда туғилган фаол аъзоси Ўш вилоятининг Қорасув туманида қўлга олинди. У Қирғизистон фуқароларини Сурия ва Ироқдаги қуролли можаро ҳудудларига тегишли тайёргарликдан ўтиш, жанговар ҳаракатларда иштирок этиш учун ёллаш ва жўнатишни ташкил этгани аниқланди», — дейилади матбуот хизмати хабарида.

Қўлга олинганга нисбатан «Ёллаш» ва «Миллий, ирқий, диний ва минтақалараро нифоқ ёйишга қаратилган фаолият» моддалари бўйича жиноий иш очилди. Ҳозирда у қўмита ҳибсхонасида сақланмоқда ва тергов ҳаракатлари олиб борилмоқда. 

Қирғизистон ҳуқуқ-тартибот идораларига кўра, жанговар ҳаракатларда иштирок этиш учун мамлакатдан 500 га яқин киши Сурия ва Ироққа жўнаб кетган.

«Дарё»нинг Telegram’даги расмий канали — @toshqindaryo’га аъзо бўлинг!