Наримон Умаров қумқўрғонлик фуқарога 100 та товуқ учун кредит олиб берди

Олий Мажлис Қонунчилик палатасидаги «Адолат» партияси фракцияси раҳбари Наримон Умаров ҳамда Сурхондарё вилоятидан сайланган депутатлар вилоятнинг Қумқўрғон туманидаги маҳаллалардаги хонадонларга ташриф буюриб, аҳолининг ҳаёти, турмуш тарзини ўрганди. Бу ҳақда Олий Мажлис Қонунчилик палатаси ахборот хизмати хабар бермоқда.

Наримон Умаров ўрганиш давомида тумандаги «Янги авлод» маҳалласида истиқомат қилувчи Анвар Назаров хонадонида бўлди.

«Депутатларнинг аралашуви билан Анвар Назаровга тижорат банкидан 100 дона товуқ парваришлаш учун кредит ажратиладиган бўлди», — дейилади расмий ахборотда.

Депутатлар Қумқўрғондаги ҳақиқий ҳолатни ўрганиш юзасидан кўпгина ижтимоий объэктларда бўлиб, жумладан, «Боботоғ» ва «Боболочин» қишлоқ врачлик пункт (ҚВП)ларини бирлаштириш борасидаги ташаббус ҳар жиҳатдан ўзини оқлашини эътироф этди.

Наримон Умаровнинг сўзларига кўра, «икки ҚВПни бирлаштириш орқали ‘Боболочин’ ҚВП негизида оилавий поликлиника ташкил этилади».

Маълумот учун, Наримон Умаров 2015 ва 2016 йилги Ўзбекистон Президенти сайловларида Президентликка номзод сифатида иштирок этган эди. Умаров 2015 йилги сайловда 2,05 фоиз (тўрт номзод орасида охирги), 2016 йилги сайловда эса 3,46 фоиз (тўрт номзод орасида учинчи) овоз олган.

«Дарё»нинг Telegram’даги расмий канали — @toshqindaryo’га аъзо бўлинг!