АҚШ президенти Дональд Трамп иммиграция тўғрисидаги янги фармонни имзолади. «Коммерсантъ» хабарига кўра, ҳужжат Эрон, Ливия, Сомали, Судан, Сурия ва Яман фуқароларига АҚШ ҳудудига кириш бўйича такроран 90 кунлик чекловни жорий этади.
Рўйхатда Ироқ йўқ. Фармонда қайд этилишича, мазкур мамлакат «алоҳида ҳолат»га тушади — Ироқ ҳукумати АҚШга йўл олган ўз фуқаролари ҳақида ахборот бериш даражасини нисбатан яхшилаган.
Шунга қарамай, фармонда белгиланишича, чегарада Ироқ фуқароларини барибир алоҳида эътибор билан кузатиш, уларнинг ИШИД ёки бошқа террорчилик ташкилотларига алоқаси йўқлигини текшириш зарур.
Янги фармон билан АҚШда қочоқларни қабул дастури яна 120 кунга тўхтатилган. Мазкур чора АҚШ қабул қилиб бўлган ёки қабул қилиш мажбуриятини олган қочоқларга нисбатан амал қилмайди. Ҳужжат 16 мартдан кучга киради.
Трамп иммиграция тўғрисидани биринчи фармонини 28 январь куни имзолаган эди, бироқ Сиэтлдаги судья 4 февраль куни мазкур фармоннинг амал қилишини тўхтатиб қўйганидан сўнг, ҳужжатга тузатишлар киритишга тўғри келди.
АҚШ Адлия вазирлиги сиэтллик судьянинг қарори устидан шикоят қилган, бироқ Сан-Франциско Апелляция суди вазирлик шикоятини қаноатлантирмаган эди. Эски фармон Ироқ, Эрон, Ливия, Сомали, Судан, Ямандан келаётган муҳожирларнинг АҚШга киришига тўрт ойга, Суриядан келаётганларнинг киришини эса номаълум муддатга чеклаб қўйган эди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)