Трамп АҚШ инфратузилмасини қайта тиклаш учун конгрессдан 1 трлн доллар сўради

АҚШда инфратузилмани янгилаш бўйича янги дастурни ишга тушириш учун 1 триллион доллар талаб қилинади. Бу ҳақда президент Дональд Трамп ўзининг АҚШ конгрессига мурожаати чоғида айтиб ўтди, деб ёзади «РБК».

У конгрессменлардан транспорт инфратузилмасини ўзгартиришни ўз ичига олувчи янги режани маъқуллашни сўради. Унинг сўзларига кўра, инфратузилманинг эскирган ва «вайрон бўлаётган» объектлари «бутун мамлакат бўйлаб нур сочадиган янги йўллар, кўприклар, туннеллар, аэропортлар ва темир йўллар билан алмаштирилади».

Трампнинг таъкидлашича, АҚШ илгарилари хорижда ҳарбий ҳаракатлар олиб боришга анча кўп маблағ сарфлаган. Уларнинг барчаси миллий аҳамиятга эга объектларни қўллаб-қувватлашга сарфланиши мумкин эди. «Бу ердаги инфратузилма вайрон бўлаётган бир пайтда Америка Яқин Шарқда тахминан 6 триллион долларни харж қилди», — деди президент.

Унинг қайд этишича, янги дастурнинг аҳамияти шундаки, унинг ёрдамида «миллионлаб» америкаликлар янги ишларга жойлаша олади.