Россия телеканаллари февраль ўртасидан Трампни камроқ тилга олишни бошлади

Россия федерал телеканаллари февраль ўртасидан эфирда АҚШ президенти Дональд Трампни камроқ тилга ола бошлади, деб ёзади Meduza.

Февраль бошида Биринчи канал, «Россия-1» ва «НТВ» Трампни турли кунларда 23 дан 61 мартагача, ойнинг иккинчи ҳафтасида кунига 36 мартагача тилга олган бўлса, 14 февралдан сўнг эслатиб ўтишлар сони ҳар куни 6—12 мартагача камайиб кетди, дейилади «Медиалогия» компанияси маълумотларида.

«РБК» нашри ойнинг уч якшанбасида Биринчи канал, «Россия-1», «Россия 24», «ТВ Центр», Бешинчи канал, «НТВ», «РБК-ТВ», Life ва «Звезда» каналлари эфирида Трампнинг тилга олинишини таҳлил қилди. Агар 5 февраль куни Трампни жами 141 дан 153 мартагача тилга олишган бўлса, 12 февралда — 116 марта, 19 февралда эса атиги 38 марта эслатиб ўтишган.

Нашр эслатишича, 16 февраль куни Bloomberg агентлиги Россия президенти маъмурияти давлат ОАВларидан АҚШ президенти Дональд Трамп ҳақида «хушомадли» материалларни камроқ чиқаришни талаб қилганини хабар берган эди. Агентлик маълумотларига кўра, ушбу фармон Трампнинг Россияга нисбатан сиёсати кутилганидек даражада дўстона бўлмаслиги юзасидан хавотирлар билан боғлиқ. Аммо Россия президенти матбуот котиби Дмитрий Песков ушбу хабарларни «бутунлай уйдирма» деб атади.