Осиё Чемпионлар лигаси мусобақасида Ўзбекистон чемпиони сифатида иштирок этаётган «Локомотив» гуруҳ босқичини мағлубият билан бошлади.
Саудия Арабистонида «Ат-Таавун» клуби меҳмони бўлган «темирйўлчилар» 67-дақиқада Игнатий Нестеровнинг хатоси сабаб гол ўтказиб юборди. Посбон тўпга югуриб чиқишда хатога йўл қўйганди. Қолган дақиқаларда унинг жамоадошлари мувозанатни тиклашнинг уддасидан чиқа олмади.
Маълумот учун, «Ат-Таавун» Осиё Чемпионлар лигасида ўзининг дебют учрашувини ўтказди. Аслида бу жамоа мусобақада иштирок этиши керак эмасди. Бироқ ОФК «Ал-Иттиҳод» футбол клубини турнирдан четлатгач, Саудия чемпионатини 4-ўринда якунлаган «Ат-Таавун»да халқаро майдонда тўп суриш имконияти пайдо бўлди.
«Локомотив» эса Чемпионлар лигасининг 2016 йилги мавсумида чорак финалга етиб борган бўлиб, гуруҳ босқичини мағлубиятсиз ўтказганди. Йил якунида клубни Иван Нагаев, Артур Геворкян, Неманья Яничич, Сервер Жепаров, Санжар Шоаҳмедов ва Олий лига тўпурари Темурхўжа Абдухолиқов тарк этди.
«Локомотив» Саудиядаги учрашувни соф ҳужумчисиз бошлади. Иккинчи бўлимга келибгина майдонда Марат Бикмаев пайдо бўлди.
Осиё Чемпионлар лигаси «А» гуруҳи. 1-тур 20 февраль, душанба
«Ат-Таавун» (Саудия) — «Локомотив» (Ўзбекистон) 1:0
Гол: Талал Ал-Абси, 67 (1:0).«Ат-Таавун»: Султон Ал-Гамди — Рикардо Мачадо, Талал Али Абси, Абдулраҳмон Ал-Барака, Жиҳод Ал-Ҳусайн, Муҳаммад Абусабан, Наиф Мусо, Маҳмуд Муаз, Алассан НъДиае, Лусиан Санмартен, Аҳмад Заин.
«Локомотив»: Игнатий Нестеров — Шуҳрат Муҳаммадиев, Ислом Тўхтахўжаев, Гнонтча Коне, Салим Мустафоев, Кахи Махарадзе, Тимур Кападзе (Саломат Қутибоев, 86), Жалолиддин Машарипов,Садриддин Абдуллаев (Қувондиқ Рўзиев, 66), Олег Зотеев (Марат Бикмаев, 57), Сардор Мирзаев.
Ўзбекистон шарафини ҳимоя қилаётган «Бунёдкор» ҳам айни вақтда Саудияда бўлиб турибди. «Қалдирғочлар» 21 февраль куни маҳаллий «Ал-Аҳли» клубига қарши ўйинда майдонга тушади.
Изоҳ (0)