БМТ Хавфсизлик кенгаши КХДР томонидан амалга оширилган сўнгги ракета синовларини қатъий қоралади ва Пхеньяндан резолюцияни бузишдан тийилишни талаб қилди, деб ёзади «ТАСС».
13 февраль, душанба куни матбуот учун қабул қилинган баёнотда Хавфсизлик кенгаши аъзолари Шимолий Корея раҳбариятига бундай ҳаракатлар такрорланадиган бўлса, «янада жиддий чоралар» кўрилиши билан таҳдид қилди.
Хавфсизлик кенгаши Корея ярим оролида вазиятни тинч йўл билан тартибга солиш тарафдори эканлигини тасдиқлади ва барча мамлакатларни Пхеньянга нисбатан жорий этилган санкциялар тўла кучга кириши учун «кучларни икки карра оширишга» чақирди. БМТ Хавфсизлик кенгашидагилар минтақадаги вазиятни диққат билан кузатиб бориши ва зарур бўлса, мавжуд санкция режимини кучайтирувчи «янада жиддий чоралар кўриши» ҳақида огоҳлантирди.
Аввалроқ Корея Республикаси Штаб бошлиқлари қўмитаси КХДР шимоли-ғарбидаги Пхёнан-Пукто провинциясида жойлашган полигондан 12 февраль куни маҳаллий вақт билан 07:55 да (Тошкент вақти билан 03:55 да) ракета парвози амалга оширилганини маълум қилган эди. Жанубий Корея ҳарбийлари маълумотларига кўра, ракета 500 километрга яқин масофани босиб ўтган.
Кейинроқ Япония мудофаа вазири Томоми Инада КХДР учирган баллистик ракета тахминан 350 км масофага парвоз қилиб, Япон денгизи акваториясига қулаганини маълум қилди.
Изоҳ (0)