Деярли бутун умрини ватанидан узоқда ўтказган хитойлик Ван Ци ниҳоят Хитойга қайтди, деб ёзади TJournal.

Хитойлик собиқ аскар 1963 йилнинг январида асирга тушгандан сўнг 54 йилни Ҳиндистонда ўтказди. У узоқ вақт ҳукуматдан уйга қайтиш учун рухсат олишга ҳаракат қилди, бироқ унга Хитой билан алоқа ўрнатиш имкони ва расмий ҳужжатлар берилмади.

Ван Ци Хитой—Ҳиндистон чегарасида геодезист бўлиб хизмат қилган. Бир куни у адашиб қолиб, икки кун ўрмонни кезган ва Ҳиндистон Қизил Хоч ташкилоти аъзолари машинасига дуч келган. Бироқ уни Хитойга қайтармасдан, Ҳиндистон ҳарбий лагерига етказишган ва бегона давлат ҳудудига ноқонуний кирган ҳарбий асир сифатида ҳибсга олишган.

У жосусликда айбланиб қамалди. Ван қамоқхонадан 1969 йилда чиқди. Шундан сўнг Ҳиндистон расмийлари ҳарбий асирларни юборадиган Тироди қишлоғига жўнатилди. 1979 йилда собиқ геодезист маҳаллий қизга уйланди.

2006 йилда Ваннинг онаси ўғли билан учраша олмасдан вафот этди. 2008 йилда собиқ аскар Хитойнинг Деҳлидаги элчихонаси билан алоқа ўрнатишга эришди. 2013 йилда Хитой элчихонаси унга паспорт берди.

10 февраль куни 78 ёшли Ван Ци Хитойга парвоз қилди ва 54 йилдан сўнг катта акаси Ван Чжиюан билан учрашди.

Ветеран Ҳиндистонга қайтиб, ҳаётининг қолган қисмини болалари ва набиралари билан ўтказиш ниятида.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.