Ҳуқуқшунослар, ҳуқуқ бўйича мутахассислар ва касбий ахлоқ соҳасидаги экспертлар АҚШ президенти Дональд Трампга нисбатан суд даъвоси қўзғамоқчи, улар уни АҚШ конституциясининг давлат тепасидаги шахсларга чет эл ҳукуматларидан мукофотлар ва тўловлар олишни тақиқловчи қоидаларини бузишда айбламоқда. Бу ҳақда CNN’га таяниб, «ТАСС» хабар берди.
Унинг маълумотларига кўра, Нью-Йоркдаги федерал судга даъвони Америка пойтахтида жойлашган «Фуқаролар Вашингтонда масъулият ва ахлоқ тарафдори» ташкилоти бермоқчи. У буни 23 январдаёқ амалга оширмоқчи.
Ташкилот вакиллари сўзларига кўра, Трамп президент лавозимига киришганидан кейин «конституция бузилишига йўл қўймаслик учун керакли чораларни кўрмаган». Улар республикачининг ўз компаниялари учун мулк ҳуқуқидан воз кечмагани, шунчаки уларни бошқаришдан ўзини четга олганига, шунингдек, ўзига тегишли активларни сотиб юбормаганига ишора қилмоқда.
Шу тариқа, бўлажак даъвогарлар Трампнинг бизнес-империяси бошқа мамлакатлар ҳукуматларига алоқадор бўлган компаниялар билан тузиши мумкин бўлган потенциал шартномалардан тушадиган даромаднинг барчаси президентга нисбатан мукофот пули бўлиб ҳисобланиши, бу эса АҚШ қонунларига зидлигини таъкидламоқда.
CNN ҳисоб-китобларига кўра, Трамп эгалик қиладиган ёки унинг қандайдир алоқаси бўлган 560 дан ортиқ компаниялар ва шерикликлар АҚШдан ташқари камида 25 та мамлакатда бизнес юритади.
Изоҳ (0)