Амирлик йиғинида иштирок этаётган Ўзбекистон миллий терма жамоасини Грузияга қарши ўртоқлик ўйинида «Пахтакор» посбони Александр Лобанов сардор сифатида бошлаб чиқди.
ЎФФ матбуот хизмати Грузияга қарши майдонга тушиши керак бўлган Ўзбекистон миллий терма жамоасининг бошланғич таркибини эълон қилганида, унга Лобанов сардорлик қилиши кўринди. Таркибдан «Пахтакор»нинг етти нафар футболчиси жой олган. Қайд этиш керак, «Пахтакор» Ўзбекистон Олий лигасини «Локомотив», «Бунёдкор», «Насаф» ва «Бухоро» клубларидан кейин 5-ўринда якунлаганди.
Чемпионатни «Пахтакор»дан олдинги ўринларда тугатган тўрт клубнинг бошланғич таркибдаги умумий улуши ҳам «Пахтакор»никидан кам бўлган. Унда «Бунёдкор»дан Элдор Шомуродов ва Отабек Шукуровни, «Локомотив»дан эса Марат Бикмаев ҳамда Ислом Тўхтахўжаевни кўриш мумкин.
Терма жамоа ҳимоя чизиғида Ислом Тўхтахўжаевга фақатгина «пахтакорчилар» ёрдам беради: Азим Аҳмедов, Станислав Андреев ва Даврон Ҳошимов. Майдон марказида Жавоҳир Соҳибов, Жамшид Искандаров кабилар бор. Ҳужум Игорь Сергеевга ишониб топширилган.
Кеча — 22 январь куни Самвел Бабаян жамоаси Дания олимпия терма жамоасига имкониятни бой берганди.
Изоҳ (0)