Теннис бўйича «Катта дубулға» туркумига кирувчи Australian Open–2017 мусобақасининг учинчи даврасида жаҳон рейтингида 117-ўринда бораётган ўзбекистонлик Денис Истомин испаниялик теннисчи, дунёнинг 31-ракеткаси Пабло Каррено Бустага қарши кортга чиқди.
Уч ярим соат давом этган беллашувда Денис Истомин 5 сетда – 6:4, 4:6, 6:4, 4:6, 6:2 ҳисобида ғалаба қозониб, фаолиятида биринчи марта Australian Open турнирининг нимчорак финалига чиқди.
«Дарё» ўз ўқувчилари орасида мазкур учрашувда ким ғолиб бўлиши борасида сўровнома ўтказган эди. Унда иштирок этган 2,2 минг респондентнинг 85 фоизи ўзбекистонлик теннисчининг ғалабасини тўғри топди.
Денис Истомин биринчи даврада хорватиялик Иван Додични 4 сетда – 6:1, 6:4, 3:6, 7:5 ҳисобида мағлубиятга учратган эди. Иккинчи даврада эса Ўзбекистон вакили дунёнинг 2-ракеткаси Новак Жоковични сенсацион тарзда таслим қилганди.
30 ёшли теннисчи нимчорак финалда болгариялик Григор Димитров (15-ракетка) ва франциялик Ришар Гаске (18-ракетка) учрашуви ғолибига қарши баҳс олиб боради. Ўйин натижасидан қатъи назар Истомин 165 минг доллар мукофот пулига эга бўлади.
Мавзуга доир: Ўзбекистоннинг биринчи ракеткаси Денис Истомин битта ғалаба билан Twitter’нинг жаҳон трендига чиқди
Изоҳ (0)