«Барса» раҳбарияти Мессини энг катта маошли футболчига айлантиришга тайёр. Карьерасининг сўнгига қадар клубда қолса бўлгани

Испаниянинг «Барселона» клуби аргентиналик ҳужумчи Лионель Мессини жамоада олиб қолиш учун уни жаҳонда энг катта маош оладиган футболчига айлантиришга тайёрлигини билдирди. Шарти — у «Барселона» билан карьерасининг якунига қадар бўлган шартномага имзо чекиши керак.

«Sports.ru» берган маълумотга кўра, Каталония клуби Мессига январь ойининг сўнггига қадар янги шартнома таклиф қилади. 29 ёшли футболчи унинг шартларига рози бўлиб, фаолиятини «Барселона»да давом эттиришга қарор қилса, дунёда энг катта маош олувчи футбол юлдузига айланади.

Айни пайтда аргентиналик бошқа бир ҳужумчи Карлос Тевес энг катта маош оладиган футболчи ҳисобланади. Уни ўз сафига қўшиб олган Хитойнинг «Шанхай Шенхуа» футбол клуби йилига 40 миллион долларнинг баҳридан кечишга рози бўлган. Бу ҳафтасига 763,5 минг доллар деганидир.

Мессининг ўзи «Барселона»нинг қароридан ҳайратда бўлса-да, шартномага имзо чекишга шошилмаслиги мумкин. Чунки унга пулдан кўра совринлар муҳимроқ. «Барселона» яна бир неча йиллар давомида ҳам бугунги мавқесида қола олишига Мессини ишонтириши керак бўлади.

Маълумот учун, Лионель Мессининг «Барселона» билан амалдаги шартномаси 2018 йилнинг ёз фаслида ўз якунига етади.

Аввалроқ Манчестер клубларидан бири Мессига «Барселона» билан шартномага имзо чекмаслик учунгина 100 миллион евро беришга тайёрлигини билдирганди. Уни ўз сафида кўришни истаётган жамоалар катта суммаларни таклиф қилаётгани учун ҳам «Барселона» футболчини сақлаб қолиш учун 1,5 йил олдин ҳаракатга тушиб қолди.