Тошкентда ёш олимлар ва талабаларнинг республика илмий-амалий конференцияси бўлиб ўтади

11 январь куни Тошкент шаҳрида «XXI аср – интеллектуал авлод асри» шиори остида ёш олимлар ва олий таълим муассасаларининг талабалари республика илмий-амалий конференцияси бўйича матбуот анжумани бўлиб ўтди.

Мазкур анжуман Ўзбекистон Республикаси Президентининг «Истеъдод» жамғармаси, Олий ва ўрта махсус таълим вазирлиги, Фанлар академияси, Фан ва технологияларни ривожлантиришни мувофиқлаштириш қўмитаси, «Камолот» ёшлар ижтимоий ҳаракати ҳамкорлигида ташкил этилган.

Конференция «Ўзбекистон Республикасида 2016 йилда ёшларга оид давлат сиёсатини амалга оширишга қаратилган қўшимча чора-тадбирлар дастури» ижроси доирасида амалга оширилмоқда. Шунингдек, ушбу илмий-амалий тадбирда Президент Ш.Мирзиёевнинг «2017—2021 йиллар давомида республика олий таълим тизимини комплекс ривожлантириш Дастурини ишлаб чиқиш тўғрисида»ги Фармойишидан келиб чиқадиган устувор вазифалар қамраб олинган.

Кўзланган асосий мақсад – фан ва технологиялар модернизацияси борасида амалий таклифлар; туб ислоҳотлар самарадорлигини ошириш бўйича таклифлар; замонавий, билимли, мураккаб вазифаларни ҳал этишга қодир ёш олимларни тарбиялашга қаратилган таклифлар; ёш олимлар илмий фаолиятини қўллаб-қувватлаш ва рағбатлантириш тизими борасидаги таклифларни ишлаб чиқиш ҳамда инновацион ғоя ва ишланмаларни амалиётга татбиқ қилишдан иборат.

Конференция республиканинг барча олий таълим муассасаларини қамраб олган бўлиб, жами 1576 нафар ёшлар қатнашди. Жорий йил 12—13 январь кунлари Тошкент молия институтида бўлиб ўтадиган якуний босқичда 122 нафар сараланган ёшлар иштирок этмоқдалар.

Илмий анжуман ялпи мажлислардан ташқари, «Ижтимоий-гуманитар фанлар», «Табиий фанлар», «Аниқ фанлар» ва «Техника фанлари» шўъбаларида олиб борилмоқда.

Тадбир якунида энг яхши илмий иш муаллифлари ташкилотчилар томонидан диплом ва қимматбаҳо совғалар билан тақдирланади.

Конференция ҳақидаги мазкур маълумотлар E-yoshlar ташаббускор ёшлар гуруҳи координатори У.Рахманкулов томонидан Facebook.com ижтимоий тармоғидаги «Вместе ми сила» гуруҳига жойлаштирилган манба асосида тақдим этилди.