Facebook сохта хабарларга қарши курашиш ва сифатли янгиликларни яратиш учун «Журналистика» лойиҳасини ишга туширди

11 январь куни Facebook ўз журналистик лойиҳасини ишга туширди, унинг мақсади сифатли журналистикани яратиш, ОАВлар билан ҳамкорлик қилиш ва фойдаланувчиларга янгиликлар бўйича саводхонликни ўргатишдан иборат, деб ёзади TJournal.

Facebook Journalism Project лойиҳаси йирик ОАВлар билан ҳамкорлик қилиб, улар билан биргаликда янги маҳсулотларни ишлаб чиқиш; журналистларга махсус тренингларда янги технологиялар ва инструментларни ўргатиш; ижтимоий тармоқ фойдаланувчиларига сифатли ва ишончли ахборот қидиришда ёрдам бериш каби учта йўналишдан иборат бўлади.

The New York Times ёзишича, тез орада лойиҳа Washington Post ва Vox каби нашрлар билан ҳамкорликни бошлайди. Келажакда ушбу рўйхатни анча кенгайтириш режалаштирилмоқда.

Нашр қайд этишича, Facebook ўзининг ахборот тарқатишдаги роли ҳақида анчадан буён мулоҳаза юритмоқда. Аммо компанияни АҚШдаги президентлик «пойгалари» чоғида янгиликларни манипуляция қилиб, сохта хабарлар тарқатишда айблашгач, ижтимоий тармоқ қалбаки хабарлар тарқалиши муаммоси билан шуғулланишга киришди.