Tatra сўнгги бор 1950 йилларда чиққан енгил автомобилларини қайтадан чиқариб, 100 минг евродан сотмоқчи

Айни вақтда юк машиналарини ишлаб чиқаришга ихтисослашган Чехиянинг Tatra компанияси енгил автомобиллар ишлаб чиқаришга қайтмоқчи, деб хабар бермоқда Motor.

Tatra вакиллари ХХ асрнинг иккита классик моделлари – Tatra 87 ва Tatra 600 Tatraplan’нинг замонавий нусхаларини ишлаб чиқариш имкониятини кўриб чиқмоқда. Tatra 87 модели 1936–1950 йилларда, Tatra 600 Tatraplan седани эса 1946–1952 йиллар давомида ишлаб чиқарилган.

Тахминларга кўра, Tatra 87 ва Tatra 600 классик дизайнини сақлаб қолади, лекин маниша янги платформали бўлади. Бўлажак автомобиллар чекланган миқдорда бўлиб, бир неча ўн экземплярда чиқарилади ва нархи 100 минг евро атрофида бўлади.

Енгил автомобилларни қайта ишлаб чиқариш бўйича якуний қарор 2017 йилнинг биринчи ярмида қабул қилинади.

Маълумот учун, Tatra енгил автомобиллар ишлаб чиқаришни 1999 йилда тўхтатган эди. Компания томонидан ишлаб чиқарилган охирги енгил машина Т700 бўлган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.