Ўзбекистонлик бир гуруҳ режиссёрлар — Сарвар Комилов, Умид Ҳамдамов ва Алишер Узоқов Москвада ташкил этилган Миллий кино форумида иштирок этиб қайтди. «Sayyod.com»нинг ёзишича, ёш киноижодкорлар мазкур анжуман доирасида тажриба алмашган, малака оширган.
Ёш режиссёрлар форум доирасида ташкил этилган маърузалар, семинарлар ва маҳорат машғулотларида қатнашган. Машғулотлар Россия давлат кинематография инстутити ўқитувчилари, муаллифлик фильмлари билан халқаро кинофестивалларда қатнашган режиссёрлар томонидан ўтказилган.
Кўпроқ актёр сифатида танилган, айни вақтда, режиссёр сифатида «Менинг акам бўйдоқ», «Кузда гуллаган дарахт» каби фильмларни суратга олган Алишер Узоқов сафар таассуротлари билан ўртоқлашди.
«МДҲ мамлакатларидан келган ёшлар билан фикр алмашиб, бир нарсага амин бўлдим — Ўзбекистонда ҳақиқатан ҳам ҳамма нарса зўр экан. Эстония, Молдова, Латвия, Литва, Қозоғистон, Қирғизистон, Тожикистондаги кино аҳволини эшицангиз, ўзбек киносига кўрсатилаётган эътибор ва ундаги имкониятлар анча яхши эканига амин бўласиз», — дейди Алишер Узоқов.
«Уларнинг кўпчилиги бизга роса ҳавас қилмоқда. Агар ўзимиздаги имкониятлардан фойдалана олсак, камида Россия даражасига чиқиб олишимиз мумкин, чунки бу ерда ҳам кино соҳасида аҳвол ҳозир ҳавас қилгулик эмас», — деб қўшимча қилди актёр ва режиссёр Алишер Узоқов.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)