Аёллар қандай ёшда бўлмасин, чиройли ва хушбичим кўринишни хоҳлашади. 45 ёшдан кейин қоматнинг ўзига хос хусусиятларини билиш ва ҳисобга олиш жуда муҳимдир. Дидингизга мувофиқ келадиган кеча либосини танлашда ёрдам берувчи айрим тавсияларни бермоқчимиз.
Сифатли ва пишиқ мато (қалин трикотаж, тафта, жаккард каби)дан тикилган кўйлакларни танланг. Бундай либослар улуғвор кўрсатиш билан бирга қоматингизга ёпишмайди ва камчиликларини билдирмайди. Шуни эсда тутингки, сизнинг мўлжалингиз – қоматингизни яққол намойиш қилмайдиган, ярим ёпишиб турувчи услуб.
Дизайнерлар шойи ва шифондан тикилган кўплаб чиройли кўйлакларни тавсия қилишади. Лекин, бундай кўйлаклар кўпинча ёш қизларга муносиб бичимда тикилади.
Бичимини аниқламаган бўлсангиз, ғилоф-кўйлак услубидаги, узунлиги тиззагача бўлган кўйлакни танлаганингиз маъқул. Унга мос келадиган пошнали туфли ва бежирим клатчни ҳам унутманг.
Агар сиз ўта тантанали кўринмоқчи бўлсангиз, диққатингизни oversize кўйлакларига қаратишингизни маслаҳат берамиз. Бундай кўйлак қоматингизни, айниқса, белдаги ўзига хос бўлган камар ёрдамида янада бежирим қилиб кўрсатади.
Ранглар масаласига келганда, ўзингиз ёқтирган ранг бўлиши билан биргаликда, улуғвор ва латофатли кўрсатувчи, тўқроқ рангларни танлаш мақсадга мувофиқ бўлар эди. Масалан, тўқ кўк, жигарранг, бинафшаранг ва бошқалар.
Изоҳ (0)