Ўзбек диаспораси Екатеринбургда очилаётган, актёр ва қизиқчи Сергей Светлаковга тегишли «Эшак» ресторани рекламасидан норози бўлди. Бу ҳақда «Урал-Ўзбекистон дўстлик жамияти» раиси Обид Туратов маълум қилди, деб ёзади «Znak.com».
Унинг сўзларига кўра, реклама плакатида шарқона либос кийиб, қўлида қозон тутган ҳолда эшакнинг ёнида ўтирган Светлаков ўзбек халқининг «салбий ва ҳақоратли» қиёфасини яратади.
Нашр таъкидлашича, Туратов Свердловская вилоятидаги инсон ҳуқуқлари бўйича вакил аппаратига ҳамда Экстремизмга қарши кураш марказига мурожаат қилган. Бундан ташқари, раис прокуратурага шикоят қилмоқчи.
«Ушбу ҳақоратли реклама олиб ташланишига эришмоқчиман. Душманлик уруғи сочилмаслиги учун. Айтайлик, халқимизнинг ёш вакиллари сархушлик ҳолатида ушбу рекламани кўриб қолиб, рестораннинг ойналарини синдирса, нима бўлади?» — дея аниқлик киритди Туратов.
«Бизда Тошкентда негадир ‘Чўчқа’ деб аталувчи рус таомлари ресторани йўқ. Чунки бу ҳам худди шундай ҳақорат бўлган бўларди!» — дея қўшимча қилди у.
Шикоятларга жавобан, ресторанни бошқарувчи Bulldozer Group компаниясининг маркетинг бўйича директори Ольга Глушкова ушбу реклама кимнингдир ҳисларини ҳақорат қилиш мақсадига эга эмаслигини таъкидлади. «Сергей Светлаков бу воқеадан жуда хафа бўлди. Бизнинг тушунишимизча, шу тариқа биз орқали ‘пиар’ қилишмоқчи. Бу воқеа тўлиғича тўқиб чиқарилган. Бизнинг ресторан ўзбек таомлари эмас, Шарқ таомларига асосланган. Ўз номимиз билан биз ҳеч кимни ҳақорат қилмаяпмиз», — деди у.
Изоҳ (0)