Россия Федерация Кенгаши раиси ўринбосари: Ўзбекистонда бўлиб ўтган муҳим тарихий воқеага гувоҳ бўлганимиздан мамнунмиз
Ўзбекистон Республикаси Олий Мажлиси Сенатида 5 декабрь куни Россия Федерацияси Федерал Мажлиси Федерация Кенгаши раиси ўринбосари Иляс Умаханов бошчилигидаги делегация билан учрашув бўлиб ўтди. Бу ҳақда ЎзА хабар берди.
Олий Мажлис Сенати Раиси Н.Йўлдошев билан суҳбат чоғида Ўзбекистон билан Россия ўртасидаги ўзаро ҳамкорлик тобора ривожланиб бораётгани қайд этилди. Парламентлараро алоқаларни мустаҳкамлаш орқали мамлакатларнинг сиёсий, савдо-иқтисодий, маданий-гуманитар ва бошқа соҳалардаги ҳамкорлигининг ҳуқуқий асосларини такомиллаштириш истиқболлари ҳақида фикр алмашилди.
– Ўзбекистон Республикасининг Биринчи Президенти Ислом Каримов мамлакатларимиз ўртасида ҳамкорлик ва дўстлик муносабатларини мустаҳкамлашга беқиёс ҳисса қўшди, – деди И.Умаханов. – Ўзбекистон Республикасида бўлиб ўтган муҳим тарихий воқеага гувоҳ бўлганимиздан мамнунмиз. Президент сайлови мамлакат миқёсида уюшқоқлик ва масъулият билан ўтди. Сайлов натижалари Ўзбекистон билан ҳамкор давлатлар қатори Россия учун ҳам муҳим аҳамиятга эга.
Учрашувда мамлакатлар парламентлари ўртасидаги ҳамкорликни ривожлантириш масалалари хусусида сўз юритилди.
