Эрдўғон Путинга ҳисоб-китобларни миллий валюталарда юритишни таклиф қилди

Туркия Россияга савдо ҳисоб-китобларида миллий валюталарга ўтишни таклиф қилди. Бу ҳақда 3 декабрь, шанба куни республика президенти Тоййиб Эрдўғон Истанбулдаги савдо марказининг очилишида маълум қилди, деб ёзади «ТАСС».

«Россия президенти Путинга савдо-сотиқни миллий валютада юритишни таклиф қилдим. Биз сизлардан олаётган барча нарса учун рублда тўлаймиз. Сиз эса бизга лирада», — деди у.

Эрдўғон худди шундай таклиф Хитой раҳбариятига ҳам билдирилганлиги ва у оқилона таклиф сифатида қабул қилинганлигини қўшимча қилди.

«Марказий банкка буйруқ бердим. Буни амалга оширишга эришамиз деб умид қиламан», — деди у.

Туркия президенти, шунингдек, фуқаролар ва маҳаллий компанияларни валюталарни турк лираларига алмаштириш ва ҳисоб-китобларни миллий валюталарда олиб боришга чақирди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.