«Янги овозлар». Муниса Ризаева лойиҳада ўзидан маҳоратлироқ ёшлар борлигига иқрор бўлди

«Янги овозлар» телетанлови Ўзбекистон Республикаси Маданият ва спорт ишлари вазирлиги ташаббуси асосида Ўзбекистон миллий телерадиокомпанияси, «Ўзбекнаво» эстрада бирлашмаси, «Ўзбеккино» миллий агентлиги, Алишер Навоий номли кино саройи ҳамда Ёшлар маданият ва санъат маркази давлат унитар корхонаси билан ҳамкорликда ташкил этилди.

Мазкур телетанлов мамлакатимиздаги ёшларнинг хонандалик йўналишидаги истеъдодини намоён этиши учун ижодий майдон яратиш, уларнинг маҳоратини ошириш, жаҳон ва ўзбек миллий хонандалиги анъаналарини тарғиб қилиш ва ривожлантириш, янги овоз соҳибларини, шунингдек, турли жанрлар ва чет тилларида куйлай оладиган ёш истеъдодларни излаб топиш ҳамда уларни профессионал санъатга жалб этиш мақсадида 18—30 ёшдаги ҳаваскорлар ва профессионал тайёргарликка эга бўлган иштирокчилар ўртасида ўтказилди.

Телетанловда Қорақалпоғистон Республикаси, вилоятлар ва Тошкент шаҳридан иштирок этиш истагини билдириб, хужжат топширган ёшларнинг сони 400 нафардан зиёдни ташкил этди.

Жорий йилнинг 20—22 июль кунлари «Ёшлар ижод саройи»да «Янги овозлар» телетанловининг дастлабки саралаш босқичи ўтказилганди. 10—11 ноябрь кунлари эса биринчи босқичнинг иккинчи саралаш босқичи бўлиб ўтганди.

Телетанловнинг илк саралаш босқичида ўз иқтидорини тўла намоён этиб, муваффақиятга эришган 120 нафардан зиёд ёш ижодкор унинг иккинчи саралаш босқичида қатнашиш имкониятини қўлга киритганди. Шундан 45 нафари иккинчи босқичда иштирок этиш ҳуқуқини қўлга киритди.

Телелойиҳага Даврон Кабулов ҳамда Нилуфар Сотиболдиева бошловчилик, Саъдулла Абдуллаев эса режиссёрлик қилмоқда.

Иштирокчиларни Ўзбекистонда халқ артисти Озодбек Назарбеков, Ўзбекистонда хизмат кўрсатган артист Юлдуз Турдиева, Адҳам Солиев, Муниса Ризаева, Хуршид Иноғомов баҳолаб бормоқда. Бундан ташқари лойиҳага Равшан Намозов. Мусохон Нурматов, Шарофиддин Муродов, Дилмурод Маткаримов сингари санъат вакилларидан иборат экспертлар гуруҳи жалб этилган.

Иштирокчиларни баҳолаш қуйидагича: саҳнага чиқиб қўшиқ куйлаган иштирокчининг ижроси ҳакамлардан бирига ёқса, у қизил тугмачани босади. Қизил тугмача босилиши билан ҳакамнинг ўриндиғига ўрнатилган чироқлар ёнади. Бу эса иштирокчининг ижроси унга маъқул келганини билдиради.

Агар учала ҳакамнинг ичидан фақат биттаси тугмачани босса, иштирокчи ўша ҳакам жамоасига қабул қилинади. Иштирокчининг ижро маҳорати учала ҳакамга ҳам бирдек маъқул бўлса, унга учала ҳакамдан бирортасини танлаш имконияти берилади. Мазкур ҳакамлар танловдан ўтган иштирокчини кейинги босқичга тайёрлаб боради.

Танловга ҳакамлик қилган Муниса Ризаеванинг фикрлари билан қизиққан журналист Феруз Муҳаммад унга қуйидаги саволлар билан мурожаат қилди.

— Танловдаги иштирокчиларнинг маҳорати ҳақида нималар дея оласиз?— Танловдаги иштирокчилар жуда ҳам маҳоратли, ҳар бир иштирокчининг ўз йўли, янги овози, ўзига хос бўлган истеъдоди бўлгани учун, уларни баҳолаш биз ҳакамлар учун жуда ҳам қийин. Ўйлашимча, кейинги босқишларда бунданда ҳам қийинроқ бўлади. Сабаби ҳар бир жамоада, яъни Озодбек Назарбеков ҳамда Адҳам Солиев жамоаларида жуда кучли ва танлаб олинган истеъдод соҳиблари бор.

— Танловдаги иштирокчилар орасида сизнинг ижодингизга қизиқадиганлари ҳам кўпчиликни ташкил қилар экан. Иштирокчи сизни танласа, бунинг сабаби аён — келгусида сизни ўзига устоз сифатида, ижодида маслаҳат бериб, йўналтириб турадиган инсон сифатида кўрмоқда. Аммо сиз уларни мусобоқанинг кейинги босқичига тайёрлаш учун ижодингиздан, тўй-томоша ва концертлардан ортиб, устозлик қилишга вақт ажрата оласизми?— Керак бўлса кун давомида, керак бўлса тўйдан сўнг бўлса ҳам албатта вақт топаман. Бундан ташқари устозим Равшан Намозов, бастакор Элдор Қаюмовлар ҳам мен билан бирга, улар билан елкама-елка туриб, иштирокчиларни кейинги босқичга тайёрлаймиз. Энди-энди қўшиқ айтиб чиқаётган вақтимда менга ишонмасдан сендан қўшиқчи чиқмайди, истеъдодинг йўқ, дея танқид қилганлар кўп бўлганди. Ўшанда устозим Равшан Намозов менга ишониб, мен билан шуғулланиб, астойдил ҳаракат қилганди. Бу иштирокчилар билан устозим иккаламиз биргаликда ишлаймиз.

— «Янги овозлар» танловидаги иштирокчиларни ўзингизнинг даражангизга олиб чиқишингизга ишонасизми?— Ишонаман!

— Иштирокчилар орасида ўзингиздан ҳам қобилятлисини кўрдингизми?— Бундай иштирокчилар танловда жуда кўп. Тўғрисини айтсам, аслида ўзим ҳам продюсерлик марказини очиб, санъатга энди қадам қўяётган ёшларга ҳомийлик қилмоқчи эдим. Бу танлов янги овозларни ўзим учун кашф қилишда айни муддо бўлди.