Nike боғичи ўзи боғланадиган кроссовкаларни 720 доллардан сота бошлади
Nike компанияси 1 декабрь, пайшанба куни боғичи ўзи боғланадиган HyperAdapt кроссовкаларини 720 доллардан сотишни бошлади, деб ёзади «Ведомости». Уларни фақат Nike+ дастури орқали ва Nike’нинг Нью-Йоркдаги янги дўконидан олиш мумкин.
Бу шу билан боғлиқки, компания ритейлерларга боғлиқ бўлиб қолмасдан, истеъмолчиларга маҳсулотларни тўғридан-тўғри сотишга интилмоқда. Бундай савдоларни у 2020 йилгача икки баравар кўпайтириб, 16 миллиард долларгача етказмоқчи.
Эслатиб ўтамиз, Nike фирмаси концепцияси «Келажакка қайтиб-2» фильмида тақдим этилган кроссовканинг реал версиясини март ойида тақдим этган эди.
Инсон товони махсус сенсорга тегиши билан оёқ кийимининг иплари ўз-ўзидан ҳаракатга келиб, боғланади. Кроссовка чеккасида иккита тугма бўлиб, улар боғланишни заифлаштириш ёки кучайтиришга хизмат қилади.
