Тошкентнинг Сергели тумани Дўстлик мавзесида жойлашган кўп қаватли уйлардан бирининг подъездида ташлаб кетилган сумка ичида янги туғилган чақалоқ топилди. Унинг дунёга келганига бир ҳафта ҳам бўлмаган эди, деб хабар қилади «Новости Узбекистана».
29 ноябрь, сешанба куни биринчи қаватдаги қафасда турган итлар болани биринчи бўлиб пайқаб, ҳура бошлади. Жониворларнинг хўжайинлари ва уларнинг қўшнилари ташқарига чиқиб, қора рангдаги спорт сумкасини кўрди. Чақирув бўйича воқеа жойига етиб келган маҳалла расмийлари иштирокида сумка очилди ва унинг ичидан овоз чиқармай қўйган бола олинди.
Участка нозири ва тез ёрдам машинаси чақирилди. Шундан сўнг туман ИИБ ва прокуратура вакиллари ҳам етиб келди. Гўдак 5-шаҳар клиник шифохонасига кўрик учун етказилди. Бола мутлақо соғлом бўлиб чиқди.
Ҳуқуқ-тартибот идоралари вакиллари аёл болани туғруқхонада эмас, балки бошқа бирор ерда дунёга келтиргани, сўнг уни ташлаб кетганини тахмин қилмоқда. Милиция ходимларининг қайд қилишича, итлар из олган, аммо излар чорраҳада йўқолган. Шундай қилиб, гўдакнинг биологик онаси ҳали ҳам топилган эмас.
Тезкор ходимларнинг ахборотига кўра, туманда охирги вақтларда шу каби тўртинчи ҳолат кузатилиши. Бундай ишга қўл урган аёллар одатда маҳаллий аҳоли вакиллари эмас — улар кўпинча Тошкент вилоятидан келиб, янги туғилган гўдакларни сумкада қолдиради ва қайтиб кетади.
Изоҳ (0)