Американинг McDonald’s ресторанлари тармоғининг ўзига хос таоми — «Биг Мак» гамбургери ихтирочиси Жим Деллигатти 98 ёшида вафот этди, деб ёзади «ТАСС».
Фаст фуд соҳасидаги новатор Пенсильвания штати Питтсбург шаҳри ташқарисида қариндошлари ва яқинлари даврасида 28 ноябрь, душанбадан 29 ноябрь, сешанбага ўтар кечаси ҳаётдан кўз юмди, аммо бу ҳақда 30 ноябрь, чоршанба кунигина эълон қилинди.
Асл исми Майкл бўлган, бироқ ўзини Жим деб аташни афзал кўрган Деллигатти «Биг Мак»ни тахминан 50 йил аввал, 1967 йилда ихтиро қилган. Ўша вақтда у франчайзинг битими бўйича McDonald’s маркаси остида фаолият юритган 47 та емакхона хўжайини бўлган.
Деллигатти тармоқнинг стандарт таомномасини иккита гамбургер котлети, пишлоқ, салат, пиёз, маринадланган бодринг бўлган катта бутербродлар билан тўлдиришга қарор қилади, улар пировардида «Биг Мак» деб ном олади.
Дастлаб McDonald’s компанияси раҳбарияти Жим Деллигаттининг ушбу ихтирони тармоқнинг бошқа ресторанларига жорий қилиш таклифига қизиқиш билдирмади. Аммо кейинчалик бу қарор қайта кўриб чиқилди ва 1968 йилдаёқ у дастлаб АҚШнинг бошқа ҳудудларида, кейинроқ эса бутун дунё бўйлаб сотила бошлади.
Изоҳ (0)