Хонанда Умидахон оч қолганида, Анвар Санаев эса қўнғироқ қилиб, «Ким бу» дейилганида асабийлашади

«Darakchi.uz» Ўзбекистон шоу-бизнесидаги машҳур инсонлар қандай ҳолатда асабийлашиши мумкинлигига ойдинлик киритди.

«Табиатан ҳушчақчақ, қувноқ қизман. Шунинг учун диққатимни ошириш бироз қийин. Бироқ қорним очса борми, умуман бошқа инсонга айланаман. Ул-бул егулик тановул қилиб олмагунимча жиғибийрон бўлавераман», — деб фикр билдирган Умидахон.

Хонанда Анвар Санаев эса қўнғироқ қила туриб, суҳбатдошининг шахсини аниқлашга киришадиганларни тушунмаслиги ҳақида айтди: «Менга қўнғироқ қилиб ‘Ким бу’ дейишса, жуда асабийлашаман. Одам қаерга, кимга қўнғироқ қилаётганини билиб туриб ҳам шундай аҳмоқона савол бериши мумкинми?».

«Туҳмат, ёлғон ва ғийбатдан тепа сочим тикка бўлади. Айниқса, санъаткорнинг қандайлигини билмай туриб, миш-миш тарқатишса, ғийбат билан ҳаётига аралашишса, бундан ҳам ёмони йўқ», — деди актриса Муқаддас Саъдуллаева.

Режиссёр Наримон Султонхўжаев одамларга беписандлик билан қарайдиганларни жини суймаслиги ҳақида айтган: «Машҳурлар билан гаплашиб, иш борасида учрашув олиб бораман. Шундай пайтда беписандлик билан қараган, халққа танилиб, кимлигини унутиб қўйган, «юлдузлик касали»га чалинганларни кўрсам, диққатим ошади».