Лавашдан тайёрланадиган 3 та оддий ва мазали таом
Лаваш бу — ноёб маҳсулот. Ундан кўп уринмасдан мазали ва ўзига хос таомлар тайёрлаш мумкин. Бунга, ўзингиз ҳар хил қиймалар билан тажрибада синаб кўриб, ишонч ҳосил қилишингиз мумкин, «Дарё» эса лавашдан тайёрланадиган энг тезпишар ва мазали таомларнинг 3 классик вариантини таклиф этади.
Балиқ солинган қаймоқли ўрама (рулет) енгил тамаддилар учун ғоятда мувофиқ. Тайёрлаш учун 300 грамм юмшоқ пишлоқ (эритилган ёки бутербродлар учун ишлатиладиган пишлоқ ҳам бўлади) олинг ва уни лавашнинг бир томонига суринг. 100-150 грамм кам тузланган қизил балиқ (хонбалиқ, лосось ёки горбуша)ни юпқа қилиб (тахминан 2 сантиметр)ли бўлакчаларга бўлинг ва пишлоқ устидан жойлаштиринг. Битта ўртача барра бодрингни юпқа қилиб (1-2 миллиметрли қалинликда) ҳалқа шаклида тўғранг ва балиқ устидан ёйиб жойлаштиринг. Қийма устидан кўкатларни майдалаб сепамиз ва айлантириб ўраймиз. Сўнгра уларни 1 соат совутгичга қўямиз, ундан кейин кенглиги 5 сантиметрли кичик ўрамачалар қилиб кесамиз.
Штрудель — лавашдан тайёрланадиган энг ноанъанавий таом дейиш мумкин. Ўз мамлакатида машҳур десерт ҳисобланадиган штрудель бизга Австриядан келиб қолган. Уни тайёрлаш учун сизга зарур бўладиган масаллиқлар: 2 дона нордон-ширин олма, 1 ош қошиқ шакар, 1 чой қошиқ долчин (корица), ваниль ёки шакар пудраси ўрами, 2 ош қошиқ сарёғ. Лавашнинг бир томонига 1 ош қошиқ сарёғни сурамиз ва майда тўғралган олмаларни ёямиз. Устидан долчинни сепиб, рулет қилиб ўраймиз. Рулетнинг устига эритилган сарёғни сурамиз ва духовкада 180-200 даражали иссиқликда 15-20 дақиқа давомида пишириб оламиз. Тайёр бўлган лавашли таом бўлакларга бўлинади ва устига шакар упаси ёки шоколадли сироп сепилиб дастурхонга тортилади.
Дурум — Арманистон анъанавий таомларидан биридир. У пишлоқнинг турли хиллари — сулугун ва бринза зичлаб солинган, кўп миқдорда шивит кўкати қўшилган лавашдан иборат. Дурумни тайёрлаш учун сизга зарур бўладиган масаллиқлар: дидингизга мос 300 грамм пишлоқ, 1 дона тухум ва турли хил кўкатлар — шивит, петрушка, кинза ва базилик. Пишлоқни йирик тишли қирғичдан ўтказинг, кўкатларни майда қилиб тўғранг. Бир қават лавашни олинг ва кўпиртирилган тухумни суринг. Лаваш ўртасига қиймани жойлаштирасиз ва учбурчак ёки квадрат шаклида лаваш чеккаларини букасиз. Ёғланган товада лавашли таомнинг ҳар иккала томонини 2-3 дақиқа давомида енгил қизартириб пишириб оласиз.
Ёқимли иштаҳа!
