Буюк Британия фуқароси 2015 йилда Парижда ва 2016 йилда Брюсселдаги террорчилик ҳужумларини ташкил этганларга молиявий ёрдам кўрсатганлигини тан олди. Бу ҳақда AFP агентлиги маълум қилди, деб ёзади «ТАСС».
26 ёшли Муҳаммад Али Аҳмад ва бельгиялик Закария Буфассил Лондондаги судда жавоб бермоқда. Улар 2015 йилнинг июлида Муҳаммад Абринийга 3 минг фунт (3,5 минг евро) етказишда айбланмоқда. Абриний 22 март куни Брюссель аэропортида теракт уюштирган террорчиларнинг шериги ҳисобланади.
Абриний, шунингдек, 2015 йилнинг 13 ноябрида Франция пойтахти ва унинг чекка қисмида содир этилган терактларни уюштиришга алоқадорликда гумонланмоқда.
«Мазкур етказилган пуллар террорчилик ҳаракатларини молиялаштиришга мўлжалланганлигига шубҳа йўқ», — деди прокурор.
Агентликнинг таъкидлашича, Аҳмад 8 ноябрь куни айбини тан олиб, кўрсатма берган. Бироқ ушбу маълумотни суд жараёни бошлангунга қадар ошкор этиш мумкин бўлмаган. Иккинчи гумонланувчи ўз айбини тан олмаган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.