Россия президенти Владимир Путин ва мамлакат бош вазири Дмитрий Медведев телевидение бошловчиси, «Қувноқлар ва зукколар клуби» (КВН)нинг доимий раҳбари, Россия Федерациясида хизмат кўрсатган арбоб Александр Масляковни 75 ёшлик юбилейи билан табриклади. Бу ҳақда «ТАСС» хабар бермоқда.

«Истеъдод, касбга бўлган қизиқиш ва туганмас қувват профессионал муваффақиятингизнинг асосий таркибий қисмига айланди, кўплаб қизиқарли ижодий режаларни амалга ошириш имконини берди. Бироқ КВН сизга ҳақиқий шуҳрат келтирди. У нафақат миллий телевидениенинг ажойиб тарих ва анъаналарга эга бўлган ёрқин лойиҳаларидан бири, балки мамлакатимиз ва бошқа давлатларнинг ёшлар ҳаракати йўналиши ҳисобланади», — дейилади давлат раҳбарининг Кремль сайтига жойлаштирилган телеграммасида.

Президент юбилярга соғлик ва барча эзгу тилакларни, КВНга эса узоқ ва бахтли ҳаёт тилади.

Медведев ўз табригида Масляков муваффақиятининг сири унинг ёрқин истеъдоди, юқори даражадаги профессионаллиги, импровизация маҳоратини ажойиб тарзда эгаллаганлигида эканлигига урғу берди.

Александр Васильевич Масляков 1941 йилнинг 24 ноябрида Свердловскда дунёга келган. Телевидениеда 1964 йилдан буён фаолият юритади. 30 йилдан ортиқ фаолияти давомида «Алло, ми ишчем таланти», «А ну-ка, девушки!», «Адреса молодих», «Песня года», «Александр-шоу» ва бошқа кўплаб кўрсатувларга бошловчилик қилган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.