АҚШ президенти Барак Обама 23 ноябрь, чоршанба куни давлат раҳбари сифатида сўнгги марта Шукроналик куни арафасида куркани афв этиш миллий анъанасини бажарди, деб ёзади «РИА Новости».
Оқ уйнинг Атиргуллар боғида бир неча ўн киши иштирокидаги маросим ўн дақиқадан кўп давом этмади.
Қисқа нутқи чоғида Обама, хусусан, «авлодлар давомида Америка президентлари Шукроналик кунини эълон қилиш ва ҳаётда иккинчи имкониятни қўлга киритишга умид қилаётганларни афв этиш каби иккита анъанага риоя қилиб келгани»ни эслатди.
«Шу ҳафтада биз унисини ҳам, бунисини ҳам бажо келтирдик», — деди давлат раҳбари майда жиноятлар учун судланган кўп сонли маҳбуслар афв этилганини назарда тутиб.
Президент нутқидан сўнг Тот лақабли куркани махсус тайёрланган подиумга қўйишди, у ерда Обама унга «ижозат қасами»ни ўқиди, Шунингдек, маросимда иккинчи курка — Тейтор ҳам бор эди, у Тот «ўз вазифаларини бажаришдан бош тортган тақдирда, унинг ўрнини босиши» кўзда тутилган эди.
Маросимдан сўнг улар Виргиния штатининг Технология университетига юборилди, у ерда куркаларни ветеринарлар ва талабалар парвариш қилади.
Изоҳ (0)