Ўртаер денгизида резина қайиқлар ҳалокати оқибатида қурбон бўлганлар сони қарийб 240 кишига етди

БМТ қочоқлар ишлари бўйича бошқармаси Ливия қирғоқларида юз берган икки ҳалокат оқибатида 239 нафар муҳожир ҳалок бўлганини билдирди. Бу ҳақда «Интерфакс» хабар бермоқда.

Аввалроқ ҳалокат оқибатида 200 киши қурбон бўлгани билдирилганди.

Дастлабки маълумотларга кўра, улар Ғарбий Африкадан йўлга чиққан ва Ўртаер денгизини резина қайиқларда кесиб ўтмоқчи бўлган. Биринчи кемадан 29 кишини қутқаришга муваффақ бўлинди, қолган 120 киши ҳалок бўлган кўринади. 120 нафардан ортиқ одам бўлган иккинчи кемада атиги 2 киши омон қолган.

Бошқарма вакилларига кўра, 3 ноябрь, пайшанба куни содир бўлган мазкур фожиа қурбонларини ҳам ҳисоблаганда жорий йилда Ўртаер денгизида ҳалок бўлган муҳожирлар сони 4200 кишига етди.