Тошкентда «Медиа, реклама ва замонавий технологиялар» халқаро форуми ўз ишини бошлади. Бу ҳақда «Дарё»га тадбир мутасаддилари маълум қилди.
Форум доирасида масс-медиа, реклама ва маркетингга оид кўплаб мавзулар, жумладан, глобал ва маҳаллий медиасаноатни ривожлантириш истиқболлари; дистрибуция тамойиллари ва халқаро ТВ-контентнинг локал адаптацияси; медиа-контентни шакллантириш ва тезкор етказиш соҳасидаги инновацион ечимлар; телеаудиторияни ўлчаш ва томошабинлар истагини аниқлаш хусусиятлари; реклама-маркетинг стратегиясининг асосий трендлари ва ностандарт усуллари; медиа агентликларининг бугунги кундаги фаолияти муҳокама қилиниши режалаштирилган.
Тадбирда телерадиокомпаниялар ва бошқа масс-медиалар, реклама ва креатив агентликлари, кабель, рақамли ва сунъий йўлдош операторларининг раҳбарлари ва етакчи мутахассислари, дастурий таъминот ва телекоммуникация ускуналари ишлаб чиқарувчилар, медиа-контент продюсерлари ва дистрибьюторлари, шунингдек, товарлар ва хизматлар кўрсатувчи компанияларнинг маркетинг, реклама ва жамоатчилик билан алоқалар бўйича ходимлари қатнашмоқда.
Форумда обрўли халқаро экспертлар — Reuters, FremantleMedia Group, SARAN MEDIA, Sony Electronics, Huawei, TNS Central Asia iTRAM вакиллари аудитория билан ўз тажриба ва фикрларини ўртоқлашади. Умумий ҳисобда форумда Ўзбекистон, Буюк Британия, Хитой, Исроил, Швейцария, Россия, Қозоғистон ва Туркиядан 200 дан ортиқ делегат иштирок этмоқда.
Қатнашчиларга ўзаро ҳамкорликнинг турли шакллари, яъни шўъба йиғилишлари, баҳслар, савол-жавоблар ва махсус ташкил этилган «Танишувлар сессияси» кўргазмаси таклиф этилади. Кўргазма давомида компаниялар ўз хизматлари ва маҳсулотларини бошқа иштирокчилар эътиборига ҳавола қилишлари ва улар орасидан потенциал ҳамкорлар – агентлар, буюртмачилар ёки пудратчиларни топишлари мумкин бўлади.
Форум ташкилотчиси SAIPRO ахборот-рейтинг агентлиги бўлиб, унга Ўзбекистон Республикаси ахборот технологияларини ривожлантириш ва коммуникациялар вазирлиги, Хусусийлаштириш, монополиядан чиқариш ва рақобатни кучайтириш давлат қўмитаси ҳамда Электрон оммавий ахборот воситалари миллий ассоциацияси кўмак бермоқда.
Изоҳ (0)