1984 йилда National Geographic журнали муқовасида чоп этилган портрети бутун дунёга машҳур бўлиб кетган афғонистонлик қочоқ Шарбат Гулани Покистонда гаров эвазига ҳибсдан озод этишга рози бўлишди, деб ёзади TJournal. У ҳужжатларни қалбакилаштирганлик учун қўлга олинган эди.
«Бу ишни қайта кўриб чиқаман, деб ўйлайман, чунки у аёл киши ва биз бунга инсонпарварлик кўзи билан қарашимиз керак. Агар биз уни депортация қилсак ёки унга Покистонни тарк этиши учун вақтинчалик виза берсак, унга қалбаки ҳужжатлар тақдим этган амалдорларга қарши айблов эълон қилиш билан шуғулланишимизга тўғри келади. Ҳақиқий жиноятчилар улардир, улар қандайдир йўл билан адолатдан қочиб қолишини истамайман», — деди Покистон ички ишлар вазири Нисар Али Хон.
Аввалроқ Шарбат Гула қалбаки ҳужжатлар сабаб Покистонда ҳибсга олингани, у 14 йилгача озодликдан маҳрум этилиши мумкинлиги ҳақида хабарлар пайдо бўлган эди.
Гула 1984 йили, унинг сурати National Geographic журнали муқовасида босилиб чиққанидан сўнг машҳур бўлиб кетган. Ўша вақтда у Афғонистондаги қочоқлар лагерида яшар эди.
Изоҳ (0)