Россия БМТнинг Инсон ҳуқуқлари бўйича кенгашига қайта сайлана олмади

Россия БМТнинг Инсон ҳуқуқлари бўйича кенгашига қайта сайлана олмади ва жорий йилнинг охирида ўз ваколатларининг муддати тугаши билан уни тарк этади, деб ёзади «ТАСС».

Бош Ассамблеяда бўлиб ўтган овоз бериш жараёнида Россия Федерацияси номзодига бутунжаҳон ташкилотининг 112 та мамлакати овоз берди. Унинг Шарқий Европа гуруҳидаги рақиблари Венгрия ва Хорватия эса тегишли тарзда 144 ва 114 та овоз олди.

Инсон ҳуқуқлари кенгашига жами 14 та аъзо сайланиб, уларнинг ваколати 1 январдан бошланади. Кенгашга Африка гуруҳидан Миср, Руанда, Тунис ва ЖАР; Осиё-Тинч океани ҳудудидан — Ироқ, Хитой, Саудия Арабистони ва Япония; Лотин Америкаси гуруҳидан Бразилия ва Куба; Ғарбий Европа ва бошқа мамлакатлардан Буюк Британия ва АҚШ ўтди.

Улардан Хитой, Куба, Саудия Арабистони, Буюк Британия ва ЖАР кенгашнинг амалдаги аъзолари ҳисобланади. 31 декабрь куни Жазоир, Марокаш, Намибия, Вьетнам, Мальдив ороллари, Македония, Мексика ва Франциянинг ваколат муддати тугайди.