Филиппинда «Хаима» тўфони 5 кишининг ҳаётига зомин бўлди

Филиппиннинг шимолий ҳудудларига ёпирилган «Хаима» тўфони оқибатида камида беш киши ҳалок бўлди. Бу ҳақда AP агентлигига таяниб, «Интерфакс» хабар бермоқда.

Табиий офат уйларнинг вайрон бўлиши ва дарахтларнинг қулашига олиб келди. Қутқарувчилар мамлакатнинг шимолий ҳудудида ўн минглаб одамларни эвакуация қилди. Тўфон оқибатида кўчкилар келиб чиққан Кагаян провинцияси энг кўп зарар кўрди.

19 октябрь куни Филиппинга кучли «Хаима» тўфони ёпирилиши кутилаётгани ҳамда мамлакатнинг шимолий қисмидаги аҳоли хавф остида экани ҳақида хабар берилганди.

Маҳаллий метеорология хизматининг маълум қилишича, тўфон вақтида шамол тезлиги соатига 315 километрга етди.