Вьетнамнинг бир қатор марказий провинцияларида ўтган ҳафта охиридан буён тўхтамаётган ёмғирлар оқибатида келиб чиққан сув тошқини қурбонлари сони 31 кишига етди. Бу ҳақда Associated Press агентлиги маълум қилди, деб ёзади «ТАСС».
Шу билан бир пайтда Вьетнам шимолига «Сарика» тўфони яқинлашиб келмоқда. Ҳукумат кемалар экипажига тўфон ҳаракатланаётган йўналишдан узоқроқда бўлишни тавсия қилди. Шунингдек, маҳаллий ҳукуматни хавф юқори бўлган ҳудудлардан одамларни эвакуация қилишга тайёр туришга чақирди.
Гонконг обсерваторияси «Сарика» тўфони Хитойнинг жанубий Хайнань оролига ёпирилганлигини маълум қилди. Бўрон эпимарказида шамолнинг тезлиги соатига 155 километрни ташкил этади. Ноқулай об-ҳаво туфайли оролда ўнлаб авиарейслар ва кемалар қатнови бекор қилинган.
Вьетнамнинг шимолий туманлари, ХХРнинг Гуанси-Чжуан автоном ҳудуди ва Гуандун провинциясида ҳам бўрондан огоҳлантириш эълон қилинган.
Эслатиб ўтамиз, аввалроқ Вьетнам марказий провинцияларида сув тошқини оқибатида қурбон бўлганлар сони 24 кишига етганлиги маълум қилинганди.
Изоҳ (0)