ЖЧ–2018 иштирокчиларида фамилия ва рақами бўлмаган дарвозабон футболкаси бўлиши керак

Халқаро футбол федерацияси (ФИФА) ЖЧ–2018 турнирини ўтказиш қоидаларига қатор ўзгартиришлар киритди. Бу ҳақда AP агентлигига таяниб, «Спорт-Экспресс» хабар бермоқда.

Янги қоидага кўра, ЖЧ–2018 турнири гуруҳ босқичида жамоалар бир хил очко, бир хил тўплар нисбати ва ўзаро ўйинларда тенгликка эга бўлса, Fair Play рейтинги, яъни футболчилар томонидан олинган сариқ ва қизил карточкалар сони инобатга олинади.

ЖЧ–2018 нинг барча иштирокчилари ўз ихтиёрида рақам ва фамилияси ёзилмаган дарвозабон учун захира форма тўпламига эга бўлиши керак. Агар дарвозабон ўйин давомида жароҳат олса ёки майдондан четлатилган пайтда захира имконияти қолмаган бўлса, рақам ва фамилиясиз футболка унинг ўрнини эгаллайдиган майдондаги футболчи учун керак бўлади.

Август ойида Болгариянинг «Лудогорец» ва Руминиянинг «Стяуа» клублари ўртасидаги Европа Чемпионлар Лигаси баҳсида шунга ўхшаш ҳолат кузатилди. «Лудогорец» футболчиси Космин Моци захира посбонига тегишли, унинг рақами ва фамилияси ёзилган футболкада ўйнашга мажбур бўлганди.

Шунингдек, янги қоидаларга кўра, ФИФА президенти жаҳон чемпиони бўлган терма жамоа сардорига совринни топширишга мажбур бўлмайди.