Тасвирий санъат галереясида Британия замонавий тасвирий санъати кўргазмаси бўлиб ўтади
Британия Кенгаши 2015 йилнинг октябридан 2016 йилнинг октябригача Ўзбекистондаги фаолиятининг 20 йиллигини нишонламоқда. Шу муносабат билан 13 октябрда Британия Кенгаши томонидан матбуот анжумани ўтказилди. Бу ҳақда Британия Кенгаши «Дарё»га маълум қилди.
Британия Кенгаши Маданият ва спорт вазирлиги, Санъат Академияси ва Тасвирий санъат миллий галереяси билан ҳамкорликнинг 20 йиллиги муносабати билан «Янги ўтмиш» мавзусида Британия замонавий тасвирий санъати кўргазмасини ўтказади.
Мазкур кўргазма Тасвирий санъат миллий галереясида ташкил этилиб, ижодий ишлари Британия Кенгаши коллекциясида сақланаётган 20 нафар ижодкор орқали Британиядаги сўнгги 20 йил ичидаги тасвирий санъатидаги руҳ ва хилма-хилликни тасвирлайди. Кўргазма очилиши шу йилнинг 28 октябрида бўлиб ўтади ва 29 октябрига қадар давом этади.
28 октябрда Тасвирий санъат миллий галереяси мажлислар залида замонавий тасвирий санъатнинг ривожида асосий йўналишлар ва тенденциялар ва кейинги ҳамкорлик қадамларини муҳокама қилиш учун Форум бўлиб ўтади. Шунингдек, мазкур йилнинг ноябрь—декабрь ойларида музей раҳбарлари ва мутасаддилари учун «Жаҳон таснифидаги кўргазма ташкил этиш йўллари» мавзусидаги янги дастур ишга туширилади.
