Исроил таълим вазири ЮНЕСКО бош директорини мамлакат ташкилот билан ҳар қандай кўринишдаги ҳамкорликни тўхтатиши ҳақида огоҳ этди. ЮНЕСКО тарафидан Қуддусдаги Ибодатхона тоғининг яҳудийларга дахлдорлигини инкор этувчи резолюция қабул қилиниши бунга сабаб сифатида кўрсатилди, деб хабар беради «РБК».
Ибодатхона тоғи — Қуддус ҳудудида жойлашган майдон бўлиб, у яҳудийлар учун биринчи даражали, мусулмонлар учун учинчи даражали муқаддас қадамжо ҳисобланади. Ушбу майдонда қадимда Биринчи ва Иккинчи Қуддус ибодатхонаси мавжуд бўлган, бугун эса у ерда ал-Ақсо масжиди жойлашган.
13 октябрь куни ЮНЕСКО Миср ва Фаластин томонидан таклиф этилган резолюцияни қабул қилди. Унда Қуддусдаги ёдгорлик майдони ислом дини билан боғлиқлиги таъкидланади, яҳудий халқининг қадамжога алоқадорлиги ҳақида эса ҳеч нарса дейилмайди. Ҳужжат Исроилни Қуддусда мусулмонлар ҳақ-ҳуқуқларини бузаётгани учун қоралайди, шунингдек, бундан буён «Ибодатхона тоғи» атамаси ўрнига қадамжо «Масжид ал-Ақсо» деб аталишини кўзда тутади.
Резолюцияни 58 мамлакатдан 24 таси маъқуллади, булар орасида Россия, Хитой, Жазоир, Бангладеш, Марокаш, Уммон, Ливан, Қатар, Эрон, Мексика бор. Исроилни АҚШ, Буюк Британия, Литва, Нидерландия, Эстония ва Германия қўллаб-қувватлади, қолган 26 мамлакат овоз беришдан тийилди.
Исроил таълим вазири, ЮНЕСКО бўйича Исроил миллий комиссияси президенти Нафтали Беннет ташкилот бош директори Ирина Боковага йўллаган мактубида бу резолюцияни «шармандали» деб атади. Мактуб матнини вазир Twitter’даги саҳифасида келтирди.
«ЮНЕСКО аъзоларининг тарихни инкор этиш ҳамда яҳудий халқининг Қуддус ва Ибодатхона тоғи билан минг йиллик алоқасига кўз юмиш ҳақидаги шармандали қароридан сўнг мен ЮНЕСКО ишлари бўйича Исроил миллий комиссиясини халқаро ташкилот билан профессионал ҳамкорликнинг ҳар қандай кўринишлари тўхтатилганидан огоҳлантирдим», — деб таъкидлади Беннет.
Беннет ташкилотни тарихни инкор этиш ва профессионалликни йўқотишда айблади.
Изоҳ (0)