Brent нефти нархи шу йил ичидаги энг баланд даражага етди

Brent нефти нархи 10 октябрь, душанба куни 9 июнь кунги савдолар чоғида эришган баррелига 52,86 долларлик маррадан ошди ва 53,41 долларгача кўтарилди, деб ёзади «Ведомости». Бу жорий йилдаги энг юқори даража бўлиб, сўнгги марта Brent бундай даражада 2015 йил октябрда сотилган.

Нефтни экспорт қилувчи мамлакатлар ташкилоти (ОПЕК)нинг сентябрдаги учрашувидан кейин 13 фоизга ўсган Brent нархи Путиннинг баёнотидан кейин июндаги қийматидан ошиб кетди.

Гап шундаки, Россия президенти Владимир Путин Россия ОПЕКнинг нефть қазиб чиқариш ҳажмини камайтириш ҳақидаги битимида иштирок этишга тайёрлигини маълум қилди. Сентябрь охиридаги учрашувда картель мамлакатлари уни кунига 32,5—33 миллион баррелгача камайтиришга келишиб олган эди. 10 октябрь куни Истанбулда нутқ сўзлар экан, у, шунингдек, ОПЕКнинг 30 ноябрдаги саммитида ушбу ғоя аниқ келишувларга айланишига умид билдирди.