Ўзбек актёрларининг биринчи гонорарлари: 244 сўм олган радиосухандон, «Сумерки»даги 750 долларлик роль, икки қисмли клипдаги ижро учун 50 минг сўм

Илк маош, илк иш ҳақи — кўпчилик кишилар учун ёддан чиқмас бир воқеа. Маълум бир моддий рағбатлантиришга лойиқ кўрилган биринчи ишини аксарият одамлар ўзгача бир завқ билан ёдга олади.

Журналист Феруз Муҳаммад бугун ўзбек киносида ўз ўрнига эга бўлган таниқли актёрлар ўртасида сўров ўтказиб, уларнинг илк гонорарлари миқдори қанча бўлгани билан қизиқди.

Актёр ва каскадёр Алихан

Биринчи гонораримни АҚШда, 2009—2010 йилларда суратга олинган «Twilight» (русча «Сумерки») фильмидаги иштироким учун олганман. Фильмдаги оммавий саҳнадан сал каттароқ ижроим учун кунига 250 доллар — уч кунда 750 доллар гонорар беришган.

Актёр Жавоҳир Зокиров

Илк олган гонорарим эсимда йўқ, аммо 1998 йилда суратга олинган «Бо Ба Бу» номли фильмдаги иштироким учун 1000 доллар олганман.

Актёр Йигитали Мамажонов

Илк олган гонорарим эсимда йўқ-ку, аммо институтнинг иккинчи курсида ўқиб юрган вақтимда роль ўйнаган дастлабки фильмларимдан бири — «Ёзсиз йил»даги (2012 йилда суратга олинган) ижроим учун 750—800 минг сўм атрофида гонорар олганман.

Актёр Акбархўжа Расулов

Кинодаги илк ролим учун қанча гонорар олганимни, тўғриси, эслай олмайман. Аммо 12 ёшимда «Келажак тонги» радиостудиясида суҳандон сифатида ишлаб, 244 сўм гонорар олганим ёдимда.

Актёр Миролим Қиличев

Биринчи — 150 минг сўмлик гонораримни хонанда Муродбек Қиличевнинг «Бахт тиларман» номли қўшиғига ишланган клипида суратга тушганим учун олганман. Бу ўша вақт учун яхшигина катта пул эди. «Уқубат» номли фильмда суратга тушганим учун 1,2 миллион сўм гонорар олганман.

Актёр Шерзод Бин

Илк гонораримни хонанда Улуғбек Раҳматуллаевнинг «Жоним» номли қўшиғига ишланган клипда суратга тушганим учун олганим ёдимда. Аммо қанча пул беришганини эслай олмайман, рости.

Актёр ва хонанда Шароф Муқимов

2002—2003 йилларда хонанда Собиржон Мўминовнинг «Онангизга куёв буламан» қўшиғининг 2 қисмли клипида суратга тушганим учун 50 минг сўм, Шаҳло Рустамованинг «Йўлингизда кўзларим ҳумор-ҳумор» қўшиғи клипидаги ижроим учун 60 минг сўм гонорар олганман. Бу ўша вақтларда оддий бир талаба учун катта пул эди. Биринчи катта гонораримни 2007 йили, Бурҳон Шароповнинг «Ниқоб» фильмидаги ролим учун олганман — ўша пайтда бу пулга битта Nexia берар эди. Ижодимдаги энг катта гонорарни эса 2006 йили «Жоним сени» номли альбомимни «Оҳанг Медиа» студиясига сотганимда олганман — ўша пулга битта Lacetti автомобилини сотиб олиш мумкин эди. У вақтларда альбом сотилишига қараб жуда катта пул таклиф қилишар эди. Видеоқароқчилар пайдо бўлганидан кейин бундай гонорарлар ҳам тарихда қолди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.