Суд ижрочилари Эквадор термаси футболчиси Эннер Валенсияни машғулот вақтида ҳибсга олмоқчи бўлди

Суд ижрочилари Англиянинг «Эвертон»клубида ижара асосида тўп сураётган, трансфер ҳуқуқи «Вест Ҳэм» жамоасига тегишли эквадорлик футболчи Эннер Валенсияни машғулот вақтида ҳибсга олмоқчи бўлди, аммо бунинг уддасидан чиқмади. Бу ҳақда AS нашри хабар бермоқда.

Ҳодиса Эквадор пойтахти Кито шаҳрида содир бўлди. Суд ижрочилари 6 октябрь куни бўлиб ўтадиган Чили терма жамоасига қарши ЖЧ–2018 турнирига саралаш босқичи ўйинига тайёргарлик кўраётган Эквадор термасининг машғулотига келди.

Хабарда қайд этилишича, 26 ёшли футболчи 17 минг доллар миқдорида алимент пули тўламаган. Полиция суд ижрочиларига Валенсияни ҳибсга олишда кўмак бермагани учун футболчи машғулотни давом эттирди.

Эннер Валенсия турмуш ўртоғининг адвокати Пол Марин полиция суд ижрочиларига футболчини ҳибсга олишда кўмак бермаганидан афсусда эканини таъкидлади.

«У мамлакат термаси сафида тўп суради, аммо ҳар ой алимент тўлай олмайди», – деди Марин.