Тошкентда Meizu М3 Note смартфони 1,35 млн сўмдан сотила бошлади

Ўзбекистонда Meizu компаниясининг М3 Note модели савдога чиқди, деб ёзади «Mobinfo.uz». Компания ушбу смартфонни арзон модель сифатида таништирса-да, унинг маҳаллий бозордаги нархини паст деб бўлмайди.

Металл корпус ва бақувват батареяга эга Meizu М3 Note смартфони апрель ойида тақдим этилган эди.

Смартфонга саккиз ядроли MediaTek Helio P10 процессори ўрнатилди. Тезкор хотира ҳажмига қараб, смартфон икки хил версияда чиқарилади (2 Гб ва 3 Гб). Хотирани қўшимча равишда microSD ёрдамида 128 гигабайтгача кенгайтириш мумкин.

Аккумулятор сиғими — 4100 мА/соат, бу 17 соат давомида видео кўриш учун етарлидир. Смартфон LTE’нинг барча частоталарини, шунингдек, VоLTE технологиясини «кўтара олади», бу автоном тарзда ишлаш вақтини анча кўпайтиради.

Дисплей ўлчами 5,5 дюймга тенг, асосий камера 13, олд камера эса 5 мегапикселлидир. Бармоқ изи сканери «Уйга» (Home) тугмасига ўрнатилган.

Смартфон кулранг, оқ ва тилларанг корпусларда тақдим этилади.

Meizu М3 Note нархи Хитойнинг ўзида 125 доллардан бошланади. Тошкентдаги «Флешка» савдо мажмуасида эса уни 1 344 000 сўмга сотиб олиш мумкин.

Ушбу қурилмани кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.