Volkswagen АҚШда бизнеси «дизель можароси»дан зарар кўрган дилерларга 1,2 млрд доллар тўлайди

Германиянинг Volkswagen автомобилсозлик концерни АҚШда компания томонидан экологик меъёрлар бузилишининг фош бўлиши билан боғлиқ можародан бизнеси зарар кўрган автодилерларга 1,2 миллиард доллар тўлайди. Тегишли даъволар Сан-Францискодаги судда ҳал этилди, деб ёзади «ТAСС».

Келишув энди судья томонидан расман тасдиқланиши керак. Товон пули бериладиган дилерларнинг аниқ сони айтилмаяпти, аммо AP таъкидлашича, автомобиль сотувчиларига битимдан чиқиб, концернга қарши индивидуал тартибда даъво беришга рухсат этилган.

Июль ойида суд дастлабки тартибда АҚШ ҳукумати ва Volkswagen ўртасидаги келишувни тасдиқлаган эди, унга кўра, компания экологик меъёрларни бузгани учун 15 миллиард доллар тўлаш мажбуриятини олади. Битим якуний равишда тасдиқланадиган эшитувлар октябрда бўлиб ўтади.

Аввалроқ Германиянинг Volkswagen автоконцерни инвесторлари компанияга қарши даъво билан чиқиб, ундан умумий миқдорда 8,2 миллиард евро товон пули талаб қилаётгани хабар берилган эди.