Сурияда бир сутка ичида жанговар ҳаракатларни тўхтатиш тартиби 78 марта бузилди

Алеппо вилоятида ўтган бир сутка давомида Суриядаги тинчлик режимини бузишнинг энг кўп ҳолати қайд этилди. Бу ҳақда Россия Мудофаа вазирлиги маълум қилди, деб ёзади «Интерфакс».

Бир сутка ичида қуролланган ноқонуний тузилмалар томонидан жанговар ҳаракатларни тўхтатиш тартиби 78 марта бузилган.

Алеппо вилоятининг Шурфа, Шкейф, Мухейм-Хандрат аҳоли пунктлари, «1070», Рамуси кварталлари, «Кастелло» савдо маркази, Ал-Асад ҳарбий академияси ва Алеппо шаҳридаги цемент заводи миномётлар, қўлбола бараварига ўт очиш тизимлари, ўқотар қуроллар воситасида ўққа тутилган.

Хабарда таъкидланишича, Дамашқ вилоятида террорчилар Хараста, Жаубар, Арбил, Дума, Хауш-ал-Фара, Хауш-Насри, Кабун аҳоли пунктлари, Хараста аҳоли пункти тиббий хизмат мактаби ва Ибн Сино шифохонасини ўққа тутган.

Латакия вилоятида Айн-ал-Кантара, Шир-Адаба аҳоли пунктлари ва ҳукумат кучларининг Абу-Али тоғ ҳудудидаги позициялари миномёт ҳужумига учраган.