Россиянинг Ростов вилояти суди 54 йил аввалги қотиллик учун Грушевская қишлоғида истиқомат қилувчи 74 ёшли Виктор Масловга нисбатан ҳукм чиқарди. Бу ҳақда «ТАСС» хабар бермоқда.
«Суд Виктор Масловга 12 йил озодликдан маҳрум этиш жазосини тайинлади», — дейилади хабарда. У «Қасддан одам ўлдириш» ва «Жавобгарликни оғирлаштирадиган ҳолатларда қасддан одам ўлдиришга суиқасд қилиш» моддалари бўйича айбдор деб топилди.
Суд маълумотларига кўра, 1962 йил июль ойида «ИЖ-58» милтиғи билан қуролланган Маслов велосипедда Грушевская қишлоғи кенгашининг раиси уйига келиб, раиснинг кўкрагига қарата ўқ узган.
Шундан сўнг у раис уйининг олдида турган участка нозири ва унинг ҳайдовчиси томон уч марта ўқ узган, бироқ улар машинанинг темир кабинаси ортига яширинишга муваффақ бўлган.
«Жиноятни содир этганидан сўнг Маслов воқеа жойидан яширинган ва қидирувга берилган. 2016 йилнинг февралида унинг қаерда экани аниқланди — Маслов Уляновск вилоятидаги қамоқхоналардан бирида бошқа бир қотиллик учун жазо ўтаётган эди», — дея аниқлик киритди Ростов области Тергов қўмитаси суриштирув бошқармаси матбуот хизмати.
Изоҳ (0)