Ҳиндистон—2016. Барча чорак финалчилар аниқ бўлган бир пайтда Ўзбекистоннинг рақиби номаълум
Ҳиндистонда бўлиб ўтаётган футбол бўйича ўсмирлар ўртасидаги Осиё Чемпионатида чорак финалга йўлланма олган барча жамоа номи маълум бўлди.
«А» гуруҳи вакиллари 21 сентябрь куни барча масалага ойдинлик киритган бўлса, 22 сентябрь куни «B» ва «C» гуруҳларида ҳам 3-тур ўйинлари якунланди.
Турнирни 0:7 ҳисобидаги мағлубият билан бошлаган Вьетнам терма жамоаси чорак финалга йўлланма олди. Австралияни 3:2, Қирғизистонни 3:1 ҳисобида мағлуб этган вьетнамликлар Жаҳон Чемпионати чиптаси учун Эронга қарши саф тортадиган бўлди.
«C» гуруҳида эса Жанубий Корея ўсмирлар терма жамоаси муваффақиятсизликка учради. 3-турда Малайзиянинг 3:0 ҳисобида мағлуб этилгани ҳам жамоага ёрдам бера олмади. Ироқ ҳамда Уммон ўзаро 1:1 ҳисобида дуранг ўйнаб, кореяликларни гуруҳда қолдириб кетди.
Бугун — 23 сентябрь куни «D» гуруҳига ҳам якун ясалади. Ўзбекистон ва КХДР термалари гуруҳ миссиясини муваффақиятли ҳал қилган бўлиб, улар ўзаро ўйин орқали гуруҳ ғолиби номига ойдинлик киритиб беради.
Беллашувда қайд этиладиган эҳтимолий дуранг натижа ҳам КХДРга гуруҳ етакчилигини тақдим этади. Ўзбекистон «D» зонасини пешқадам сифатида якунлай олса, Жаҳон Чемпионати чиптаси ўйналадиган учрашувда Ироққа тўқнаш келади. Гуруҳда карвонбошилик КХДРга насиб қилса, Ўзбекистоннинг чорак финалдаги рақиби Уммон бўлади.
Ўзбекистон ва КХДР термалари иштирокидаги ўйин Тошкент вақти билан 18:30 да старт олади. «Спорт» телеканали учрашувни 18:25 дан бошлаб жонли намойиш этади. Mtrk.uz сайтида кўрсатилганидек, «Локомотив» — «Обод» ўйини 17:55 да эмас, балки 22:20 да эфир юзини кўради, деб «Дарё»га маълумот берилди.
